Maraming tagahanga ng young actress na si Jennylyn Mercado ang matutuwa sa balitang nakuha ng PEP (Philippine Entertainment Portal). Ayon sa mismong PR manager ng OctoArts Films na si Ms. Aster Amoyo ay kasama na si Jennylyn sa cast ng One Night Only. Ito ang magsisilbing comeback project ng kauna-unahang StarStruck Ultimate Female Survivor pagkatapos niyang isilang ang anak nila ng dati niyang boyfriend na si Patrick Garcia.
Ang One Night Only ay isa sa dalawang entries ng film company ni Boss Orly Ilacad sa 2008 Metro Manila Film Festival (MMFF). Ang isa pa ay ang reunion movie nina Tito Sotto, Vic Sotto, at Joey de Leon na Iskbul Bukol 20 Years After (The Adventures of Victorio Ungasis and the Escalera Brothers).
Makakasama ni Jennylyn sa One Night Only sina Katrina Halili, Diana Zubiri, Paolo Contis, Alessandra de Rossi, Ricky Davao, Jon Avila, Candy Panglinan, Chokoleit, Jason Gainza, at ang mga kapatid ni Jennylyn sa management ni Becky Aguila na sina Valerie Concepcion at Joross Gamboa.
Matatandaang noong unang prinesenta ang One Night Only sa screening committee ng MMFF ay kasama sa cast ang ilan sa prime talents ng Star Magic, ang talent arm ng ABS-CBN. Pero napabalitang pinull out ang mga ito dahil ayaw raw ng Star Magic na magmukhang suporta ang mga alaga nila kay Katrina, na isang Kapuso star.
Ang bagay na ito ay hindi kinumpirma ng Star Magic at maging ng ilan sa mga artistang naunang naugnay sa pelikula. Pero sa presscon para kay Katrina noon kasabay ng pagpirma niya ng kontrata sa OctoArts Films, nabanggit ni Boss Orly ang mga pangalan nina Angelica Panganiban, Diether Ocampo, at Roxanne Guinoo na kasama rin sa pelikula na ididirek ni Joey Reyes.
Pinagtalunan kasi noon kung sino ang magiging bida sa One Night Only at kung sino ang mauuna sa billing kung natuloy nga si Katrina at ang ilang Star Magic talents. Pero nilinaw naman ni Direk Joey na ang istorya ng pelikulang siya rin ang sumulat ay iikot sa lahat ng characters sa isang motel sa loob lamang ng isang magdamag.
Huling napanood si Jennylyn sa pelikula sa pamamagitan ng Half Blood Samurai.
Source: http://www.pinoyexchange.com/forums/showthread.php?t=362585
No comments:
Post a Comment